Дане Гаврилоски
Гостивар, Македонија

Со акваристика се занимавам 7-8 години. До сега имам одгледувано повеќе видови риби, на почеток живоротки, а како што поминуваше времето повеќе се ориентирав кон икрашите.
Моментално имам два украсни аквариуми: Стариот од околу 80 литри во кој се наоѓаат: пар скалари, пар крибензиси, мало јато неонки, и уште некои риби на кои се уште не им е одреден аквариум. Од чистачи во аквариумот има коридораси (Coridoras paleatus i Coridoras panda), кули-кули и анциструси.
Другиот (нов) аквариум е со димензии 110 х 50 (основа) х 60 (висина). Во него освен еден трихогастер (Trichogaster leeri), има јатни видови риби: барбуси (Barbus conchonius, Barbus tetrazona, Barbus oligolepsis, Barbus odesa, Barbus titeya), серпи (Hyphessobrycon serpae), 2 хокеарки (Thaeria obliqua), Hemigramus erytrozonus и уште некои харациниди. Покрај нив има и 3 анциструси. Во овој аквариум се привремено сместени и околу 70-80 млади крибензиси од претходниот мрест. Двата аквариуми се во стил на комбиниран биотоп, сличен на амазонски, густо засаден.
Покрај овие аквариуми имам и повеќе помали помошни аквариуми кои служат за мрестење и одгледување на подмладокот.
До сега успешно имам изведено мрест на скоро сите видови живоротки, а од икрашите: трихогастер (Trichogaster trichopterus), зебри (Danio rerio i Danio frankei), борци (Betta splendens), макроподи (Macropodus opercularis), крибензиси (Pelvicachromis pulcher) и конхониуси (Barbus conchonius). Наскоро се очекува успешен мрест на неонки (Hyphessobrycon inessi) (веќе имаа еден мрест, но икрата пропадна поради лош квалитет на водата), анциструси и скалари.
Наскоро на овој сајт ќе се најдат текстови во кои ќе бидат опишани моите искуства околу ова.